ശരീരത്തിലെ ഓരോ അവയവങ്ങളെയും ക്യാൻസർ പിടിമുറുക്കുമ്പോഴും തളരാതെ ആത്മവിശ്വാസത്തോടെ ഇങ്ങനെ ചിരിക്കാൻ പറ്റുമോ സക്കീർ ഭായിക്ക്? ഹൃദയംതൊട്ട് നന്ദു മഹാദേവയുടെ കുറിപ്പ്!

0

ക്യാൻസർ എന്ന രോഗം ഏതെങ്കിലും ഒരു അവയവത്തെ കാർന്നു തിന്നാൻ ആരംഭിക്കുമ്പോൾ മുതൽ വിധിയെ പഴിച്ച് തന്നിലേയ്ക്ക് സ്വയം ഒതുങ്ങിക്കൂടാനാണ് പലരും ശ്രമിയ്ക്കാറുള്ളത്. എന്നാൽ അതൊരു രോഗാവസ്ഥ മാത്രമാണെന്നും ആത്മവിശ്വാസവും മനക്കരുത്തും കൃത്യമായ മെഡിക്കൽ അറ്റെൻഷനും മൂലം ക്യാൻസറിനെ തുരത്തി ഓടിക്കാൻ സാധിക്കുമെന്നും പലരും കാണിച്ചുതരികയും ചെയ്തു. ചെറിയ പ്രശ്നങ്ങളിൽ വരെ പതറിപ്പോകുന്ന പലരും ക്യാൻസർ പേഷ്യൻസ് കണ്ടുപഠിക്കണം എന്ന് പലരും പറയാറുണ്ട്. കാരണം പല വലിയ പ്രതി ബന്ധങ്ങളിലൂടെയാണ് അവർ കടന്നു പോയിക്കൊണ്ടിരിക്കുന്നത്, അതും എല്ലാം ശരിയാകും എന്ന ആത്മവിശ്വാസത്തോടെ. അത്തരത്തിൽ ആത്മവിശ്വാസവും ധൈര്യവും പകർന്നു തരുന്ന ഒരു പോരാളിയാണ് നന്ദു മഹാദേവ.

തന്റെ ശരീരത്തെയും ജീവനെയും കാർന്നു തിന്നു കൊണ്ടിരിക്കുന്ന ക്യാൻസറിനെ തന്റെ കാമുകിയായി കണ്ടുകൊണ്ട്, പ്രതീക്ഷകളുടെ പുതിയ കിരണങ്ങൾ തെളിയിക്കുവാൻ ആണ് നന്ദു മഹാദേവ ശ്രമിയ്ക്കാറുള്ളത്. സമൂഹമാധ്യമങ്ങളിലൂടെ തന്റെ രോഗാവസ്ഥയെ നന്ദു നേരിടുന്നത് എപ്രകാരമാണ് എന്ന് പലപ്പോഴും നന്ദു മഹാദേവ പങ്കുവയ്ക്കാറുണ്ട്. നന്ദുവിനെ പല പോസ്റ്റുകളും വൈറലായി മാറാറുണ്ട്. ജീവിതത്തിൽ എല്ലാം നഷ്ടപ്പെട്ടു എന്ന് കരുതുന്ന ഏതൊരാൾക്കും വീണ്ടും പിടിച്ചു കയറുവാൻ എന്തെങ്കിലുമൊക്കെ ഉണ്ടെന്ന് തോന്നിപ്പിക്കുന്ന തരത്തിലുള്ള പ്രചോദനം നൽകുന്നവയാണ് നന്ദുവിന്റെ ഓരോ പോസ്റ്റുകളും.

അത്തരത്തിൽ ഇന്നിപ്പോൾ നന്ദു മഹാദേവ പങ്കു വച്ചിരിക്കുന്ന ഒരു കുറിപ്പാണ് വൈറലായി മാറിയിരിക്കുന്നത്. ഒരുപാട് വേദന തരുന്ന നിമിഷത്തെ പോലും ധൈര്യം തരുന്ന വാക്കുകൾ കൊണ്ട് പറഞ്ഞു ഫലിപ്പിച്ചിരിക്കുകയാണ് നന്ദു ഇപ്പോൾ. ക്യാൻസറിനെ ഇതുവരെയും കണ്ടെത്തിയിട്ടില്ലാത്ത ഒരു വകഭേദമാണ് തന്റെ ശരീരത്തിൽ ഉള്ളതെന്നും അതിന് പ്രത്യേക മരുന്നുകൾ ഒന്നും ഇപ്പോൾ ശേഷിക്കുന്നില്ല എന്നുമാണ് നന്ദു തന്റെ കുറിപ്പിലൂടെ വ്യക്തമാക്കിയിരിക്കുന്നത്. നന്ദുവിനെ ഈ കുറിപ്പ് വളരെയധികം വേദനയാണ് നന്ദുവിനെ സ്നേഹിക്കുന്ന ഓരോരുത്തർക്കും നൽകുന്നത്. എന്നാൽ പോലും ഇനിയും പ്രതീക്ഷ തുടരുകയാണ് നന്ദു എന്ന് അറിയുമ്പോൾ ഒരു ആത്മവിശ്വാസവും ധൈര്യവും വരുന്നുണ്ട്. നിരവധി ലൈക്കുകളും കമന്റുകളും ഇതിനോടകംതന്നെ നന്ദുവിന്റെ കുറുപ്പിന് താഴെയായി എത്തിയിട്ടുണ്ട്.

കിറിപ്പിന്റെ പൂർണരൂപം :

വീണ്ടും വീണ്ടും ശരീരത്തിന്റെ ഓരോ അവയവങ്ങളേയും ക്യാൻസർ പിടി മുറുക്കുമ്പോഴും തളരാതെ ആത്മവിശ്വാസത്തോടെ ഇങ്ങനെ ചിരിക്കാൻ പറ്റുമോ സക്കീർ ഭായിക്ക്. അസഹനീയമായ വേദന ശരീരത്തെ കുത്തിക്കുത്തി നോവിക്കുമ്പോഴും ഇങ്ങനെ നിവർന്ന് നിന്ന് ജീവിതം പൊരുതാനുള്ളതാണെന്ന് പറയുവാൻ കഴിയുമോ സക്കീർ ഭായിക്ക്. ഇനി പരീക്ഷിക്കുവാൻ മരുന്നുകൾ ബാക്കിയില്ല എന്ന് ഡോക്ടർമാർ പറയുമ്പോഴും സാരമില്ല സർ അവസാന നിമിഷം വരെയും നമുക്ക് ചെയ്യാനുള്ളതെല്ലാം ചെയ്യാം എന്നു പറഞ്ഞ് ഓരോ നിമിഷവും ആസ്വദിച്ചു ജീവിക്കുവാൻ കഴിയുമോ സക്കീർ ഭായിക്ക്. But I Can.!
എനിക്ക് കഴിയും.

അതു തന്നെയാണ് എന്നെ ഞാനാക്കുന്നതും. ഇനിയുള്ള യുദ്ധം ഒറ്റയ്ക്കാണ് ചങ്കുകളേ. മിക്കവാറും ഇനി കൂട്ടിന് കീമോ മരുന്നുകളോ സർജറിയോ ഒന്നുമുണ്ടാകില്ല. എന്റെ ക്യാൻസറിന്റെ മോളിക്കുലാർ ടെസ്റ്റ് റിസൾട്ട് വന്നപ്പോൾ ഞെട്ടിയത് ഞാൻ മാത്രമല്ല ഡോക്ടർമാർ കൂടിയാണ്. ഈ ഭൂമിയിൽ ഇത്രയും കോടിക്കണക്കിന് ക്യാൻസർ രോഗികൾ ഉള്ളതിൽ ഇങ്ങനൊരു വകഭേദം ആദ്യമായാണ് മെഡിക്കൽ സയൻസിൽ രജിസ്റ്റർ ചെയ്യപ്പെടുന്നത്. അതുകൊണ്ട് തന്നെ നിലവിൽ ഇതിനായി മരുന്നൊന്നുമില്ലത്രേ. ഇനി എനിക്കായി ഒരു മരുന്ന് കണ്ടുപിടിക്കപ്പെടണം. എനിക്കുറപ്പുണ്ട് അത്തരമൊരു മരുന്ന് കണ്ടുപിടിക്കപ്പെടുക തന്നെ ചെയ്യും. അതിനായി കിണഞ്ഞു പരിശ്രമിക്കുന്ന എന്റെ ഡോക്ടർമാരുടെ സ്നേഹത്തിന് മുന്നിൽ ശിരസ്സ് നമിക്കുന്നു. എനിക്കറിയാം എനിക്ക് മാത്രമല്ല പ്രശ്നങ്ങളും പ്രതിസന്ധികളും. ഈ പോസ്റ്റ് വായിക്കുന്ന എന്റെ ചങ്കുകളിൽ ഭൂരിഭാഗം പേരും എന്തെങ്കിലും പ്രശ്നങ്ങളെ നേരിട്ടു കൊണ്ടിരിക്കുന്ന സാഹചര്യം ആയിരിക്കാം ഇത്.

ചിലർക്ക് സാമ്പത്തികം മറ്റു ചിലർക്ക് കുടുംബപ്രശ്നങ്ങൾ വേറെ ചിലർക്ക് ശാരീരികമോ മാനസികമോ ആയിട്ടുള്ള വിഷമതകൾ അങ്ങനെ പലതരത്തിൽ ആകുമത്. പക്ഷേ നമ്മൾ തോറ്റു കൊടുക്കരുത്. ചങ്കൂറ്റത്തോടെ നേരിടണം. ജീവിതത്തിന്റെ ഒരു ഘട്ടത്തിലും പരാജയപ്പെടും എന്നു മുൻവിധിയെഴുതി തോൽക്കാൻ സ്വയം നിന്നുകൊടുക്കരുത്. മുന്നിലുള്ള ഓരോ സാധ്യതകളും ഉപയോഗപ്പെടുത്തി പരമാവധി രക്ഷപ്പെടാൻ ശ്രമിക്കണം. അങ്ങനെ പൊരുതി ജയിക്കുന്നവരെ സമൂഹം അങ്ങേയറ്റം ഊഷ്മളതയോടെ സ്നേഹിക്കും. ഈയുള്ളവന്റെ ഏറ്റവും വലിയ നേട്ടം പേരോ പ്രശസ്തിയോ ഒന്നുമാണെന്ന് കരുതുന്നില്ല. അതിലൊന്നും വലിയ കാര്യവുമില്ല. നെഞ്ചോടു ചേർത്തുവയ്ക്കാൻ അനേകം ഹൃദയബന്ധങ്ങൾ കിട്ടി എന്നുള്ളതിനെക്കാൾ വലുതായി മറ്റൊന്നുമില്ല. അതൊരു പുണ്യമായി കരുതുന്നു. ഓരോ ബന്ധങ്ങളും അത്രമേൽ അമൂല്യമാണെന്ന് മനസ്സിലാക്കുന്നു. നമ്മളെല്ലാവരും എപ്പോഴും ഒരു സ്നേഹവലയമാകണം. ഞാനുമങ്ങനെയാണ്. എന്നിൽ സ്നേഹം മാത്രമേയുള്ളൂ.

അപൂർവ്വം ചിലർക്കെങ്കിലും അത് അനുഭവപ്പെട്ടിട്ടില്ലെങ്കിൽ അത് നിങ്ങളെന്റെ ഹൃദയത്തിനുള്ളിലേക്ക് എത്തിനോക്കുവാൻ ധൈര്യപ്പെടാത്തത് കൊണ്ട് മാത്രമാണ്. എൻറെയുള്ളിലേക്ക് എത്തിനോക്കുവാൻ ധൈര്യപ്പെടുന്നവരുടെ ഹൃദയത്തിലേക്ക് എന്റെയും സ്നേഹം ഒഴുകിയെത്തിയിരിക്കും. ജീവിതം വളരെ ചെറുതാണ്. ഇനി എനിക്കും നിങ്ങൾക്കും ഒക്കെ എത്ര നിമിഷങ്ങൾ ഉണ്ടെന്നോ എത്ര ദിവസങ്ങൾ ഉണ്ടെന്നോ എത്ര മാസങ്ങളോ വർഷങ്ങളോ ഉണ്ടെന്നോ ഒന്നും നമുക്കറിയില്ല. അത് എത്ര തന്നെയായാലും കുഞ്ഞു കുഞ്ഞു തമാശകളും നല്ല നല്ല എഴുത്തുകളും പോസിറ്റീവ് ചിന്തകളും സ്നേഹാന്വേഷണങ്ങളും ഒക്കെയായി നമ്മൾ അടിച്ചു പൊളിക്കും. ഒപ്പം മതിലുകളില്ലാതെ അങ്ങട് സ്നേഹിക്കും. ഒരു നിമിഷമെങ്കിൽ ഒരു നിമിഷം പുകയാതെ ജ്വലിക്കും. അല്ലപിന്നെ.

ശ്വാസകോശത്തിന് ഇൻഫെക്ഷൻ ബാധിച്ചു വേദന കൂടുതൽ ആയിട്ട് കഴിഞ്ഞ ഒരാഴ്ചയായി ഹോസ്പിറ്റലിൽ അഡ്മിറ്റ് ആണ്. ഇന്നലെ മുതൽ റേഡിയേഷനും തുടങ്ങി. ഓരോ പരുങ്ങലിന് ശേഷവും പൂർവാധികം ഭംഗിയോടെയുള്ള അതിശക്തമായ തിരിച്ചുവരവാണ് എന്റെ ചരിത്രത്തിലുള്ളത് എന്ന് നിങ്ങൾക്കറിയാമല്ലോ. ഇത്തവണയും കനലുകൾ ചവിട്ടിമെതിച്ചു ഞാൻ വരും. ശാരീരികമായ വേദനകളും ബുദ്ധിമുട്ടുകളുമൊക്കെ ഉണ്ടെങ്കിലും മനസ്സുകൊണ്ട് ഞാൻ സുഖമായിരിക്കുന്നു. സന്തോഷമായിരിക്കുന്നു. എന്റെ പ്രിയപ്പെട്ട എല്ലാവർക്കും സുഖമാണെന്ന് വിശ്വസിക്കുന്നു. ഞാനെന്നെ തന്നെ സർവ്വേശ്വരന് സമർപ്പിക്കുന്നു. എല്ലാവർക്കും നന്മയുണ്ടാകട്ടെ. പ്രാർത്ഥിക്കുക ചങ്കുകളേ. സ്നേഹപൂർവ്വം നിങ്ങളുടെ സ്വന്തം
നന്ദു മഹാദേവ.