വെറ്ററിനറി സയന്‍സില്‍ മികച്ച വിജയം നേടുന്ന ആദ്യ പണിയ സമുദായംഗം; വയനാടിന് അഭിമാനമായി അഞ്ജലി

0

കേരളാ വെറ്ററിനറി സര്‍വകലാശാലയില്‍ നിന്നും വെറ്ററിനറി സയന്‍സ് ആന്റ് അനിമല്‍ ഹസ്ബെന്ററി ബിരുദത്തില്‍ ഫൈനല്‍ പരീക്ഷകളില്‍ മികച്ച വിജയം നേടി നാടിന് അഭിമാനമായി ഡോ. അഞ്ജലി. പത്ത് സെമസ്റ്ററുകളുള്ള ഈ ബിരുദപഠനത്തില്‍ ഒമ്പത് സെമസ്റ്റര്‍ വരെ മികച്ച വിജയമാണ് അഞ്ജലി സ്വന്തമാക്കിയത്. നിലവില്‍ ഇതേ സര്‍വകലാശാലയില്‍ ഇന്റേര്‍ണ്‍ഷിപ്പ് നടത്തിവരികയാണ്. ആറ് മാസമാണ് ഇന്റേണ്‍ഷിപ്പ് കാലാവധി. അതിന് ശേഷം പി ജി ചെയ്യാനാണ് ആഗ്രഹിക്കുന്നതെന്ന് അഞ്ജലി പറഞ്ഞു.

പുല്‍പ്പള്ളിയിലെ ചീയമ്പം-73 ലെ ഭാസ്‌കരന്റേയും സരോജിനിയുടെയും മകളായ അഞ്ജലി പട്ടികവര്‍ഗ വിഭാഗത്തിലെ പിന്നോക്കം നില്‍ക്കുന്ന പണിയ സമുദായംഗമാണ്. പണിയ വിഭാഗത്തില്‍ നിന്നും ഈ നേട്ടം കൈവരിക്കുന്ന ആദ്യ വ്യക്തിയാണ് അഞ്ജലിയെന്നത് ഈ നേട്ടത്തിന് ഇരട്ടി മധുരം പകരുന്നു. പരിതാപകരമായ ജീവിതാവസ്ഥകളെ അതിജീവിച്ചാണ് അഞ്ജലി ഈ നേട്ടം കൈവരിക്കുന്നത്. വിജയത്തില്‍ അഞ്ജലിയെ അഭിനന്ദിക്കാന്‍ ജില്ലാകലക്ടര്‍, ഐ സി ബാലകൃഷ്ണന്‍ എം എല്‍ എ തുടങ്ങിയവര്‍ രംഗത്തെത്തിയിരുന്നു. സോഷ്യല്‍മീഡിയയിലൂടെയാണ് ഇവര്‍ അഭിനന്ദനമറിയിച്ചത്. നിരവധി പേരാണ് ഡോ. അഞ്ജലിയെ അഭിനന്ദനമറിയിച്ച് സമൂഹമാധ്യമങ്ങളില്‍ ഫോട്ടോ പോസ്റ്റ് ചെയ്തിരിക്കുന്നത്. വീട്ടുകാരുടെയും നാട്ടുകാരുടെയും, അധ്യാപകരുടെയും, സുഹൃത്തുക്കളുടെയും അകമഴിഞ്ഞ പിന്തുണയാണ് ഈ നേട്ടം കൈവരിക്കാന്‍ സഹായകമായതെന്ന് അഞ്ജലി പറഞ്ഞു.

കോളനിയിലെ ഓള്‍ട്ടര്‍നേറ്റീവ് സ്‌കൂളിലാണ് അഞ്ജലി ഒന്ന് മുതല്‍ നാലാംക്ലാസ് വരെ പഠനം നടത്തിയത്. പിന്നീട് പുല്‍പ്പള്ളി വേലിയമ്പം ദേവിവിലാസം സ്‌കൂളില്‍ നിന്നും എട്ടാംക്ലാസ് വരെയുള്ള പഠനം പൂര്‍ത്തിയാക്കി. തുടര്‍ന്ന് പൂക്കോട് ഗവ. മോഡല്‍ റസിഡന്‍ഷ്യല്‍ സ്‌കൂളില്‍ നിന്നും പത്താംക്ലാസ് വരെ പഠനം നടത്തി. പ്ലസ്ടു പൂര്‍ത്തിയാക്കിയത് തിരുവനന്തപുരം ശ്രീകാര്യം കട്ടേല മോഡല്‍ റസിഡന്‍ഷ്യല്‍ സ്‌കൂളിലായിരുന്നു. പിന്നീടാണ് പൂക്കോട് വെറ്ററിനറി സര്‍വകലാശാലയില്‍ ബാച്ചിലര്‍ ഓഫ് വെറ്ററിനറി സയന്‍സ് ആന്റ് ആനിമല്‍ ഹസ്ബെന്ററി ബിരുദത്തിന് ചേരുന്നത്.